صندوق التنبيهات أو للإعلان

تم إنشاء هذه المدونة بهدف تعليم الكمبيوتر والإنترنت وكل ما يخص هذه التقنيات حتى تكون عوناً لمن هم في أول الطريق ولم تكن لديهم الفرصة للذهاب إلى مراكز التدريب ولم يكن لديهم الوقت الكافي للتعلم وأرجو الله سبحانه وتعالى أن تكون هذه المدونة مفيدة للجميع.

تشاهد الأن جميع تدوينات شهر مايو 2010. إظهار كافة الرسائل

الدرس الثالث

أضف تعليقالاثنين, مايو 31, 2010, مرسلة بواسطة Osama Sanad

بسم الله الرحمن الرحيم

سمسم : فهمان باشا عامل إيه يا مان ؟
فهمان :  كويس الحمد لله ... يا ترى هناخد إيه بقى النهاردة ؟
سمسم : قبل ما ناخد حاجة جديدة ... عملت إيه ف إللي فات ؟ فيه حاجة واقفة معاك مش فاهمها ؟
فهمان : لأ بصراحة كل حاجة تمام الله ينور عليك يا أبو السماسم .
سمسم : طيب المرة إللي فاتت إحنا خدنا مكونات الكمبيوتر التلاتة إللي هما ....
فهمان :  الهارد وير والسوفت وير والبيبول وير ... صح كده ولا إيه ؟
سمسم : إيه ده .. إيه ده يا عم فهمان ماشاء الله عليك إيه الجمال ده أيوه كده ... تصدق إنك إنت كده هتفتح نفسي للشرح ... تمام كده .
فهمان :  الله يخليك يا أبو السماسم ... أخجلتم تواضعنا ... ماهو البركة فيك برضو .
سمسم : طيب ... فاكر يا عم فهمان التعريف بتاع الكمبيوتر إللي قولناه قبل كده ؟
فهمان : تقريباً كده عبارة عن جهاز بياخد مننا بيانات وبعدين بيتعامل معاها ويحولها لمعلومات إحنا
            بنستفيد منها وكل الكلام ده بسرعة وبدقة صح كده ؟
سمسم : الله ينور عليك ... طيب إنت عارف الكمبيوتر هياخد مننا البيانات إزاي وبعدين يرجع يدينا
            معلومات إزاي ؟
فهمان : لأ طبعاً ... إزاي يا سمسم قول قول ده الموضوع شكله كده هيحلو قوي .
سمسم : أول حاجة عشان أدخل بيانات للكمبيوتر لازم يكون معانا حاجة إسمها وحدات إدخال أو
            Input Units ( إن بوت يونتيس ) وعشان ناخد منه معلومات لازم يكون عنده وحدات إخراج أو       Output Units ( أوت بوت  يونتيس ) .
فهمان :  إيه الكلاكيع دي يا أبو السماسم أنا مش فاهم حاجة .
سمسم : طيب بص إفترض معايا إنك إنت عايز تصور حد من صحابك أو قرايبك مثلاً بالكاميرا   بتاعت الموبايل ماشي .
فهمان :  ماشي كده مفيش مشاكل .
سمسم : طيب ينفع تعمل الكلام ده والموبايل بتاعك مفهوش كاميرا ؟
فهمان :  لأ طبعاً تيجي إزاي دي ؟!
سمسم : أهي الكاميرا بتاعة الموبايل دي إسمها وحدة إدخال عن طريقها بندخل صور متحركة    للموبايل يبقى ينفع نسميها وحدة إدخال أو Input Unit أو ( إن بوت يونيت ) .
فهمان :  آااااااااااه فهمت فهمت .
سمسم : طيب إفرض بقى إنك إنت معاك شريط أو إسطوانة فيديو وعايز تشوفه ينفع تشوفه من غير ما      يكون عندك جهاز فيدو أو دي في دي مثلاً ؟
فهمان :  برضو لأ مش ينفع .
سمسم : أهو جهاز الفيديو ده أو جهاز الدي في دي ينفع نقول عليه وحدة إخراج أو Output Unit أو ( أوت بوت يونيت ) .
فهمان :  أيوه كده يا راجل مش تقوللي الكلاكيع إياها دي أنا كده فهمت الحمد الله .
سمسم : طيب الحمد لله ... نرجع بقى للكمبيوتر ... يبقى عشان ندخل بيانات للكمبيوتر لازم يكون     عندنا وحدة إدخال وعشان ناخد معلومات من الكمبيوتر لازم يكون عندنا وحدة إخراج .
فهمان :  تمام كده أنا فاهم ... بس زي إيه الوحدات دي ؟
سمسم : هقوللك ... مش إحنا قولنا قبل كده إن أنواع البيانات دي ممكن تكون حروف أو أرقام أو رموز أو صور أو لقطات فيديو ؟
فهمان : آه قولنا .

سمسم : طيب لو حبيت تدخل حروف أو أرقام أو رموز يبقى لازم يكون عندنا حاجة إسمها لوحة    مفاتيح أو Keyboard أو ( كي بورد ) زي إللي موجودة في الصورة دي :
            وطبعاً في منها أشكال وألوان كتير بس المهم إن كلها فيها حاجات ثابتة زي ما هشرح لك دلوقتي .
فهمان :  طيب نوصل الكي بورد ده مع الكمبيوتر إزاي ؟
سمسم : حلو السؤال ده ... بص يا عم شايف السلك إللي موجود في الصورة إللي فوق ده ؟!... أهو السلك ده هو إللي هتوصله في الكمبيوتر من  ورا ... وعلى فكرة ... فيه نوعين من السلك ده أول نوع :  إللي هو القديم يعني فيه منو بس مش كتير وده إسمه PS2 ( بي إس تو) وتاني نوع :  إللي هو الجديد وده هتلاقي كل الكي بوردات الجديدة إللي في السوق بتبقى زي كده  وده إسمه USB ( يو إس بي ).

 وعلى فكرة لو إنت عندك كي بورد قديمة يعني ( بي إس تو ) وعايز تخليها ( يو إس بي ) يبقى لازم             تجيب وصلة إسمها كونفيرتر Converter زي إللي موجودة في الصورة وبعدين توصلها مع الكي بورد             ووصلة اليو إس بي مع جهاز الكمبيوتر وعلى فكرة  كل الأجهزة دلوقتي إللي موجودة في السوق زي             البرينتر Printer أو الإسكانر Scanner أو الكاميرا Camera كلها ليها وصلة USB (يو إس بي ) .
فهمان :  طيب هو إيه الفرق بين الإتنين دول ؟!
سمسم : الفرق في سرعة نقل البيانات للجهاز طبعاً الجديد إللي هو ( اليو إس بي ) USB هو الأسرع .




فهمان :  طيب معلش ممكن توريني إزاي أركب الكي بورد في الجهاز ؟!
سمسم : بص يا باشا ... بص إعمل زي إللي موجود في الصورة ولو عندك جهاز كمبيوتر ممكن تشيل الكي بورد وترجع تركبها تاني عشان تتدرب وما تخفش الموضوع ده سهل وبسيط جداً مش محتاج أي حاجة .

أكمل قراءة المقالة

الدرس الثاني

أضف تعليقالأحد, مايو 23, 2010, مرسلة بواسطة Osama Sanad

بسم الله الرحمن الرحيم

سمسم : إزيك يا أبو المفاهيم عامل إيه .
فهمان :  الحمد لله ماشي الحال ... هناخد إيه النهارده يا سمسم ؟
سمسم:  بص يا عم أولاً الكمبيوتر ده عبارة عن جهاز إلكتروني يعني بيتشغل بالكهربا بياخد مننا بيانات وبعدين يتعامل معاها ويحولها لمعلومات نقدر نستخدمها في حياتنا وكل الكلام ده بيتم في لحظات بمنتهى الدقة بس بشرط إن تكون البيانات إللي داخلة تكون سليمة .
فهمان :  واحدة واحدة عليا يا عم سمسم .. يعني إيه بيانات ومعلومات دول إللي إنت قولت عليهم؟
سمسم:  البيانات دي عبارة عن حاجات خام يعني مثلاً لو أنا كتبتلك شوية حروف وأرقام ورموز  زي  كده ، تقدر تفهم منها حاجة  ؟!


فهمان :  لأ طبعاً ... دا  إنجليزي ده يا سمسم ؟


سمسم:  لكن إنت بمخك النضيف ده كونت منها جملة زي دي، تقدر تفهم منها حاجة !؟


فهمان :  آه طبعاً ده إسمي وعنواني .




سمسم : طيب دلوقتي بقى عشان نقول إن إنت عندك كمبيوتر وبتتعامل معاه لازم يكون عندنا تلات حاجات . أول حاجة الــ HardWare وبعدين الــ SoftWare وأخر حاجة الــPeopleWare  .




فهمان :  إيه دا إيه ده ... واحدة واحدة يا عمنا يعني إيه بقى الكلام الكبير قوي ده ؟
سمسم : بص يا عم فهمان الــهاردوير HardWare ده عبارة عن كل الحاجات إللي ممكن تلمسها بإيدك في الكمبيوتر زي الشاشة ولوحة المفاتيح والماوس وكده يعني أما الــسوفت وير SoftWare ده عبارة عن البرامج إللي بتشغل الكمبيوتر وبتعملنا حاجات معينة زي الويندوز Windows وبرنامج الوورد Word وبرنامج الإكسيل Excel وإن شاء الله هنتكلم ع الحاجات دي كلها بالتفصيل بعدين... ماشي أما بقى الــعنصر البشري إللي هو الــ PeopleWare ده بقى معناه البني آدمين إللي بيشتغلوا على الكمبيوتر زي المستخدم العادي اليوزر User إللي زيك إنت كده بعد ما تخلص الكورس والمبرمج أو البروجرمر Programmer إللي هو بيعمل البرامج إللي الناس بتشتغل عليها والمصمم إللي هو الــديزاينر Designer إللي هو بيعمل التصميم بتاع البرنامج أو الرسومات بتاعة الإعلانات أو بتاعة مواقع الإنترنت وفيه كمان مسئول الصيانة بتاع الــ Maintenance .



فهمان :  تمام كده ... ميت فل وعشرة أنا كده فهمت، بس فيه سؤال عندي .. هو الكمبيوتر ده عبارة عن نوع واحد بس إللي كلناعارفينه؟


سمسم : حلو قوي السؤال ده ... طيب عشان أجوبك ع السؤال ده إيه رأيك لو ناخدهم واحدة واحدة من الكبير للصغير ... ماشي ؟!


فهمان :  ماشي يا جنتله معاك .


سمسم:  أول حاجة ... فيه حاسبات كبيرة جداً ممكن تقول      عليها كده عملاقة Super Computers وقوية ومكلفة جداً وتقدر تتعامل مع مليارات المعلومات في لحظة ودي بيتسخدموها الجماعة  بتوع  الأرصاد والوكالات الكبيرة قوي زي وكالة ناسا بتاعة الفضاء.
 
تاني حاجة ... فيه حاسبات رئيسية يعني Mainframe Computers ودي برضه كبيرة بس مش زي العملاقة يعني يا دوبك يحطوها في أوضة لوحدها ويشغلولها تكييف ودي بيستخدموها البنوك وشركات التأمين عشان كمية البيانات الكتيرة قوي .



           تالت حاجة ... فيه حاسبات شخصية أو بيرسونال Personal وطبعاً دي بقى الكمبيوترات المعروفة زي إللي موجودة في البيوت والشركات والمدارس وسموها حاسبات شخصية عشان الأشخاص العاديين إللي زي وزيك ممكن يستخدموها ودي أسعارها بسيطة ممكن أي واحد يشتريها .


رابع حاجة ... الحاسبات المحمولة يعني البورتابل Portable Computer إللي منها اللاب توب Laptop أو النوت بوك Notebook طبعاً ميزة الأجهزة دي إنها أصغر من الحاسب الشخصي يعني ينفع يتشال معاك في أي مكان وبتشتغل بالكهربا العادية أو بالبطارية لما تكون خارج البيت وفيه نوع منه إسمه بي دي إيه PDA وده إختصار لكلمة Personal Digital Assistant يعني المساعد الرقمي الشخصي والأجهزة دي في معاها قلم عشان يساعد في الكتابة عليها. وفيه كمان الأجهزة الكفية أو البام توب Palmtop ودي إتسمت كده عشان جهاز  أد الكف . ماشي كده يا عم فهمت أنواع الكمبيوتر كلها إنت معايا ولا نمت يا عم فهمان ؟!
فهمان:   لأ لأ أبداً أنا معاك ومنتبه كويس قوي بس فيه حاجة صغيرة ... إنت فاكر الواد بوبو بتاع الكاويتش خادني معاه مرة البتاع ده إللي إسمه السايبر مش إسمه كده برضه ؟! سمسم:  تمام كده إيه الجمال ده أنا قربت أبهت عليك أهو ماله بقى السايبر ده ؟!
 
فهمان :  ما أنا جايلك في الكلام أهو كان فيه أجهزة كمبيوتر كتير ولما سألت الواد بوبو عن الأجهزة دي قاللي إن كل الأجهزة دي متوصلة مع بعض عاملة شبكة ... يعني إيه بقى شبكة؟!
سمسم:  الله ينور عليك أنا لسه كنت هتكلم على أخر نوع من   أنواع الكمبيوتر بس إنت سبقت وأخدت الكلمة من بقي بص يا عم ده مش يعتبر نوع بالظبط بالظبط لكن كل الأنواع إللي فاتت دي لو وصلناها مع بعض بيبقى إسمها شبكة والتوصيلة دي إتعملت عشان أي واحد يقدر ياخد أي حاجة ( ملفات يعني ) من أي جهاز  من إللي متوصلين في الشبكة دي أو ممكن كل الأجهزة تطبع على طابعة واحدة  وطبعاً لازم يكون فيه جهاز يخدم عليهم، الجهاز  ده إسمه السيرفر Server وهو ده إللي بيتحكم في كل الأجهزة وكل جهاز في الأجهزة التانية إسمه كلاينت Client يعني الزبون إللي عايز الخدمات .. فهمت؟!
فهمان :  فهمت الحمد لله وربنا يكرمك بس بصراحة أنا تعبت وحاسس إن المعلومات إللي أنا خدتها ممكن تطير من دماغي، فياريت نكمل بكرة إن شاء الله .
سمسم:  ماشي كلامك يا عم فهمان بس أقوللك على نصيحة حاول تراجع تاني ع الحاجات دي واحدة      واحدة مع نفسك بكرة وقبل الحصة إللي جاية مش ممكن المعلومة تروح منك ماشي يا عم ياللا سلام .
فهمان :  سلام يا سمسم .
أكمل قراءة المقالة

الدرس الأول

أضف تعليقالأحد, مايو 23, 2010, مرسلة بواسطة Osama Sanad

بسم الله الرحمن الرحيم


فهمان : إلا قوللي يا سمسم يعني إيه كمبيوتر ده ...  إللي فالقين بيه دماغنا كل شوية؟
سمسم : وإنت إيه إللي وصلك لموضوع الكمبيوتر ده يا عم فهمان ؟
فهمان : أنا عارف يا خويا كل م روح في شركة عشان أشتغل يسألوني ع الموضوع ده وبيقلولي
على حاجة كده تانية  إسمها شهادة الإيه دي إس إل ؟
سمسم : ها ها ها ها …. تقصد الـ الأي سي دي إل ICDL يا عم فهمان .
فهمان : أيوه هو البتاع ده إللي بتقول عليه ... وطبعاً أخوك زي الشاطر ولا فاهم حاجة .
سمسم : بص يا عم أول حاجة شهادة الـ ICDL دي عبارة عن 7 مواد بتدرسهم في الكمبيوتر ولما تبقى كويس فيهم بتروح تمتحن في أي مركز عنده معمل إمتحانات ICDL ولما تنجح يدوك الشهادة بتاعتها إللي بتقول إنك إنت بتفهم في الكمبيوتر كويس وكمان اللغة بتاعتك كويسة، ماشي يا عم ؟
فهمان : ماشي يا سمسم لحد كده فاهم .
سمسم : أما بقى موضوع الكمبيوتر ده هأقولك ... طبعاً التسمية دي إنجليزي، طيب جت منين؟ كلمة يحسب إللي هي بالعربي معناها بالإنجليزي كومبيوت Compute ولما نخليها حاسب بالعربي تبقى بالإنجليزي كمبيوتر Computer طبعاً ضيفنا حرف الـ R  في أخر الكلمة  وبقت ... حاسب آلي يعني كمبيوتر... وكمبيوتر يعني حاسب ألي... فهمت يا عم فهمان  ولا  لأ؟
فهمان : أيوه أيوه فاهم طبعاً... أمال إيه.... طيب ممكن تديني كورس في الكلوب... قصدي كورس في الكمبيوتر ده لحسن أخوك بقى شكله وحش قوى قدام الناس وصحابي عمالين يضحكو عليا في كل حتة والواد بوبو بتاع الكاويتش ده منتا عارفه ... بقي بيفهم كويس قوي في الكمبيوتر وبيقعد ع النت بالساعات ... ينفع كده وصاحبك حبيبك في حيص بيص وعموماً يا عم  هشوفك برضه زي زي أي حد غريب ماشي ؟
سمسم : بص يا عم إيه رأيك هجيلك البيت وأديلك الدروس دي كل يوم ساعة ومن غير فلوس كمان ماشي يا عم عايز حاجة تاني ؟
فهمان :  إيه ده والله العظيم ؟ ... على فكرة بقى إنت واد جدع أوي وصاحب صاحبه كمان وأنا مش هنسالك حركة الجدعنة دي معايا.
سمسم : بص يا عم أنا مش عايز منك غير إنك تدعيلي إنت والحاجة ... ماشي يا عم ومعادنا إن شاء
الله بكرة .
فهمان : ماشي يا أبو السماسم يلا سلام .
سمسم : سلام .
أكمل قراءة المقالة